عدالت کے ذریعے تنسیخ نکاح

واضح رہے کہ اگر میاں بیوی  کے درمیان ناچاقی کی صورت ہویا شوہر بیوی پر ظلم کرتا ہو جس کی وجہ سے  وقت گزارنا مشکل ہو تو ایسی صورت میں بیوی اپنے شوہر سے خلع لے سکتی ہے ،لیکن خلع دینے کا حق  شوہر کو حاصل ہے ،کوئی آدمی یا کوئی ادارہ اور تنظیم  کسی کی بیوی کو خلع نہیں دے سکتی ،تاہم اگر شوہر متعنت ہو یعنی حقوق ادا نہ کرتا ہو ،  نان نفقہ نہ دیتا ہو اور اس پر ظلم کرتا ہو تو اس صورت میں عورت  عدالت  جا سکتی ہے ۔عدالت اگر پوری تحقیق کے بعد اس نتیجے پر پہنچے کہ شوہر واقعتا متعنت ہے یعنی بیوی کو نہ حقوق دیتا ہے اور نہ آزاد کرتا ہے تو ایسی صورت میں عدالت  تنسیخِ نکاح کی ڈگری جاری کرسکتی ہے اور اس سے بیوی مطلقہ ہوجائے گی اور عدت گزارنے کے بعد دوسری جگہ شادی کرسکےگی  ۔ لہذا صورت مسئولہ کے مطابق اگر شوہر واقعی حقوق کی ادائیگی سے منکر ہو ،نان نفقہ نہ دیتا ہو اورظلم کا مرتکب ہو تو عدالت کی جاری کردہ تنسیخ ِنکاح کی ڈگری نافذ ہوگی اوراس کی بیوی  مطلقہ شمار ہوگی ،لہذا عدت گزارنے کے بعد دوسری جگہ نکاح کر سکتی ہے۔   وأما المتعنت الممتنع عن الإنفاق، ففي مجموع الأمير مانصه إن منعها نفقة الحال، فلها القيام فإن لم يثبت عسره أنفق أو طلق وإلا طلق عليه. قوله:وإلا طلق عليه: أي طلق عليه الحاكم من غير تلوم. (الحيلة الناجزه للحليلة العاجزة، ص:132،73) فتویٰ نمبر : 7369/297/324 دارالا فتاء جامعہ عثمانیہ پشاور تاریخ تصدیق : 2026-01-22 خلع عدالت یاپنچائیت کے ذریعے تنسیخِ نکاح