شوہر کے ظلم و تعنت کی بنا پر عدالتی تنسیخِ نکاح

میاں بیوی کے ازدواجی تعلقات  قائم ہونے کے بعد اگر شوہر باوجود قدرت کے بیوی کے حقوق اور نان نفقہ  وغیرہ کی ادائیگی سے انکار کرے  اور اس کے ساتھ ظلم وزیادتی کا رویہ رکھے جس کی وجہ سے عورت کےلیے خاوند کے ساتھ زندگی گزارنا مشکل ہو تو ایسی صورت میں اصل حکم تو یہ ہے کہ عورت شوہر کو طلاق یا خلع پر راضی کرکے اس سے  چھٹکارا  حاصل کرے تاہم اگر شوہر نہ تو حقوق ادا کر رہا ہو اور نہ ہی طلاق یا خلع پر راضی ہوتا ہو تو ایسی صورت میں یہ شوہر  متعنت کہلاتا ہے اور متعنت کی بیوی کو مسلمان  حاکم یا عدالت کی طرف  رجوع کرنے  کا اختیار ہے۔ایسی صورت میں عدالت مکمل تحقیق کرے اگر عورت شوہر کے ظلم وستم کو ثابت کرے تو عدالت شوہر  کو حکم دے  کہ  یا تو بیوی کو صحیح طریقہ سے  آباد کرویا طلاق دے دو  اگر وہ آباد کرے تو ٹھیک ،اگر انکار کرے یا عدالت کا سمن ملنے  کے باوجود بغیر کسی عذر کے عدالت میں شوہر یا اس کا وکیل حاضر نہ ہو اور بیوی  اس کی زوجیت  سے نکلنا چاہتی ہو تو تب عدالت عورت کو تنسیخ نکاح کی ڈگری دے سکتی ہے اور یہ تنسیخ شرعا معتبر ہوگی اور عدت گزرنے کے بعد عورت دوسری جگہ نکاح کرسکتی ہے ۔ صورت مسؤلہ میں  مذکورہ عورت کی طرف سے  عدالت میں دائر کردہ درخواست اور عدالتی فیصلہ میں ذکرشدہ تفصیلات  (جو سوال کے ساتھ منسلک ہیں)اگر حقیقت پر مبنی ہوں،کہ  عورت نے شوہر کے ظلم و زیادتی کی بنا پر نکاح سے علیحدگی کا دعویٰ دائر کیا ، جس کی شوہر نے ابتدائی طور پر تردید کی ، پھر عدالت نے دونوں فریقین کو آئندہ سماعت پر گواہ پیش کرنے کا حکم دیا ، جس  پرعورت  نےعدالت میں حاضر ہو کر اپنے دعویٰ پر معتبر گواہ پیش کیے، جبکہ شوہر بلا عذر شرعی نہ خود حاضر ہوا   اور نہ ہی اپنے وکیل کو پیش کیا ہو۔توشوہرکا تعنت ثابت ہونے کی وجہ سے عدالت کا فسخ نکاح کا فیصلہ شرعاً معتبر ہوگا۔اور تعنت ثابت ہونے کی صورت میں شوہر کا راضی نہ ہونے باوجود بھی  تنسیخ نکاح کا فیصلہ معتبر ہوگا۔جس کے بعدعورت  کے لیےعدت گزرنے کے بعد دوسری جگہ نکاح کر نا جائز ہے۔   ولا يكون التفريق بذلك إلا عند القاضي أما بدون فسخ القاضي فلا ينفسخ النكاح بينهما.(الفتاوی الهندية،كتاب النكاح،ج:1،ص:292( وأما المتعنت الممتنع عن الإ نفاق ،ففي مجموع الأمير ما نصه : إن منعها نفقة الحال،فلها القيام،فإن لم يثبت عسره أنفق،أو طلق،وإلاطلق عليه۔قال محشيه :( وإلاطلق) أي عليه الحاكم من غير تلوم ۔(الحيلة الناجزة ، ص:3(13 فتویٰ نمبر : 7355/297/324 دارالا فتاء جامعہ عثمانیہ پشاور تاریخ تصدیق : 2025-12-25 کتاب النکاح متفرقات